Medhald for Vegvesenet om E16 Lærdalstunnelen

- Oslo Tingrett gir oss medhald i at vår tildeling er rett. No vil vi signere kontrakt med arbeidsfellesskapet Skanska og Vassbakk & Stol ein av dei nærmaste dagane, seier prosjektleiar Susanne Svardal i Statens vegvesen.

Saka starta då Vegvesenet i juni melde at arbeidsfellesskapet Skanska og Vassbakk & Stol var tildelt den store oppgraderingskontrakten i verdas lengste vegtunnel. Entreprenør OneCo Infra, som kom på andreplass i konkurransen, klaga på tildelinga og kravde etter kvart midlertidig forføying, som betyr at avgjersla låg på is inntil avgjerd i retten.

Saka var oppe i Oslo Tingrett 24. august, og i dag kom altså svaret.

- Dette er svært gledeleg og betyr at me no kan begynne å planlegge oppstart av arbeidet i tunnelen. Dette er ei god avklaring både for kommunane rundt tunnelen, trafikantane og dei mange som skal jobbe med veganlegget, seier prosjektleiar Svardal.