No er dato for oppstart i Lærdalstunnelen klar

- Kontrakten er signert med arbeidsfellesskapet Skanska og Vassbakk og Stol, og om eit par veker startar arbeidet med klargjering for oppstart i områda rundt tunnelen, seier prosjektleiar Susanne Svardal i Statens vegvesen.

Måndag 16. november kl. 18.00 startar den første 12-timars stenginga, og slik vil det halde fram dei neste to åra.

Klokkeslett for stenging vil bli handheva strengt, slik at det vil vere nyttelaust å kome fem minutt for seint når nattestenginga trer i kraft.

For lokale bebuarar i Aurland og Lærdal blir det eit busstilbod med tre avgangar på kveldstid frå begge sider av tunnelen før midnatt. Elles skal det vere mogleg å få fram utrykkingskøyretøy gjennom tunnelen på kort varsel når det står om liv og helse.

Natt til søndag er tunnelen open for trafikk.

Også arbeid på dagtid

På dagtid kan entreprenøren utføre arbeid som ikkje krev stenging. Då vil tunnelen vere open for trafikk, men kan bli snevra inn til eitt køyrefelt på korte strekningar med lysregulering.

På grunn av tunnelen sin viktige funksjon som transportåre aust-vest, er det planlagt at når rv. 7 Hardangervidda er stengd under uvêr vinterstid, skal Lærdalstunnelen haldast open. Dette er det kontraktsfesta at entreprenøren må tilpasse seg.

Klargjering rundt tunnelen

Men først startar arbeidet med å klargjera til anleggsarbeid i tunnelen, og dette vil begynne om eit par veker. Mellom anna skal hovudbrakkeleir og lager for entreprenøren settast opp på Håbakken, og på sida mot Aurland skal kontor og containarar for produksjonen settast opp mellom Sogneporten og tunnelmunninga.

To tunnelriggar skal bore og sikre i tunnelen under sprengingsarbeida, og entreprenøren skal jobbe seg innover frå Aurland-sida. Det skal etablerast straum, vatn og avløp til riggområda på begge sider av tunnelen, og reinseanlegg for prosessvatn.

- Planlegg reisa di!

Statens vegvesen tilrår at du planlegg reisa di dersom du skal køyre E16 mellom Austlandet og Vestlandet frå november, og spesielt vere merksam på trafikkhindringar mellom Bergen og Lærdal. Det er lurt å bruke vegvesen.no/trafikk før du køyrer, og installere Vegvesenet sin Trafikk-app på mobilen. Vi oppmodar deg til å reise på dagtid, og vurdere om du kan ta i bruk alternative ruter.

Rv.7 Hardangervidda blir ein viktig alternativ rute mellom aust og vest, og i tillegg kjem Vikafjellet inn som eit alternativ for trafikken mellom Indre Sogn og Bergen. Det er allereie sett inn ein ekstra nattavgang på ferjesambandet Vangsnes-Hella, og når Lærdalstunnelen stenger blir det to avgangar til på natt.