NIBIO har kartlagt jorda langs framtidige vegtrasear på Vestlandet

Store delar av Vestlandet har mangla jordsmonnkart, i motsetnad til Austlandet. I Vestland fylke er berre om lag 15 prosent av det fulldyrka og overflatedyrka arealet jordkartlagt, mot rundt 95 prosent i Akershus, Vestfold og Østfold.

– Utan jordsmonnkart kunne me ikkje vurdera jordbruksareal på lik linje med andre tema. Difor har me leigd inn NIBIO der økonomien i vegprosjekta har tillate det, seier Hilde Sanden Nilsen frå Statens vegvesen.

Kartlegginga har mellom anna vore viktig i planlegginga av E16 og Vossebanen mellom Arna og Stanghelle, og i samband med E39-utbygginga i Bergen kommune.

– På Vestlandet har me registrert mykje grunn jord og mange areal med dårleg evne til å bli kvitt overflødig vatn. Samstundes viser kartlegginga at mange areal har større produksjonspotensial enn dagens tilstand kan gje inntrykk av. Mange av areala kunne ha produsert meir om dei hadde vorte drenert, seier Siri Svendgård-Stokke, avdelingsleiar i NIBIO.

Kartgrunnlaget er tilgjengeleg gjennom NIBIO sine opne kartløysingar og kan nyttast av kommunar, landbruksnæringa og andre som treng kunnskap om jordsmonn.

Denne pressemeldingen er basert på en artikkel publisert på NIBIO.no. Medier kan fritt benytte både innholdet i pressemeldingen og tilhørende bilder mot kreditering av fotograf og henvisning til NIBIO.