Øving i E39 Bogstunnelen

– Vi skal gjennomføra ei øving i samarbeid med brannvesenet, VTS og 110 som ein del av arbeidet med tryggleiksgodkjenning etter tunneloppgraderinga, seier brannvernleiar Kjetil Larsen i Statens vegvesen.

Målet med øvinga er at både brannvesenet og VTS skal verta kjente med dei tekniske og operative endringane som er gjennomførte i tunnelen etter oppgraderinga.

– Dette understrekar at trafikktryggleik og beredskap er eit felles samfunnsansvar, der fleire aktørar deltek, kvar med sine unike og viktige bidrag, legg han til.

Tidspunkt

I samband med øvinga blir det styrt trafikkavvikling klokka 19.30-20.00 og  21.00-21.30.

I tidsrommet 20.00–21.00 blir tunnelen stengd.

–  Statens vegvesen har forståing for at stengd tunnel er krevjande for trafikantane. Men då er det viktig å minna om at vi gjer dette for dei. Av tryggleiksomsyn både for både trafikantar og etatar som sørger for trafikantane si sikkerheit er det nødvendig å stenga tunnelen ein time medan øvinga pågår, avsluttar brannvernleiar Kjetil Larsen i Statens vegvesen.

Som ein del av øvinga vil det verta nytta ufarleg teaterrøyk. Trafikantar og naboar må vera merksame på at røyken kan vera synleg utanfor tunnelopningane på begge sider av Bogstunnelen medan øvinga finn stad.