Ny rasteplass opnar ved Lærdalsfjorden

Langs Nasjonal turistveg Aurlandsfjellet, omlag fire km vest for Lærdalsøyri, ligg Røyrnes vakkert til ved Lærdalsfjorden. Denne populære stoppestaden for turistar og lokalbefolkninga har no fått eit solid løft.  

Gjennom det nye prosjektet har Røyrnes fått ei trygg av- og påkøyring frå fylkesvegen. Det moderne toalettbygget, med sin glassfasade og markerte tak, gir Røyrnes ein tydeleg arkitektonisk identitet i tråd med turistvegsatsinga sitt særpreg. Bygget har eit HC-WC og to unisex-toalett samt eit teknisk rom.

På det tilrettelagde opphaldsarealet kan publikum nyte utsikta og ta ein god rast. Ei eiga rastetrapp gir god tilgang til fjorden. Her kan besøkande kome tett på vatnet eller ta eit bad. Rasteplassen har kapasitet til elleve personbilar, inkludert éin HC-plass, fem bubilar i tillegg til avfallshandtering.

- Røyrnes er ein flott stoppestad på køyreturen over Aurlandsfjellet. Med nytt servicebygg, opphaldsareal, god parkering og enkel tilgang frå vegen ligg alt til rette for at vegfarande kan ta ei god pause i møtet mellom fjord og fjell, seier Silje Myhre Amundsen, seksjonsleiar for Nasjonale turistveger i Statens vegvesen.

Anlegget på Røyrnes er eit av fem turistvegprosjekt Statens vegvesen har etablert langs Nasjonal turistveg Aurlandsfjellet. Andre kjente turistvegtiltak er utsiktspunktet Stegastein, rasteplassane Sluppen og Flotane og kunstinstallasjonen «Den» av Mark Dion på Vedahaugane.

Byggherre: Statens vegvesen
Arkitekt: Jensen og Skodvin Arkitektkontor AS v/ Jan Olav Jensen
Konstruksjonsteknikk: Degree Of Freedom AS
Entreprenør: Brun Bygg AS