Avlyser utvida stengetid i Nappstraumtunnelen

Statens vegvesen trekker med det varselet om å stenge tunnelen to timar tidlegare på Flesa og ein time tidlegare på Napp, frå og med 16. november til 6. desember. 

– Etter at vi sende ut varselet, har vi sett at ulempa for folk og lokalsamfunnet samla sett blir for stor. I samråd med entreprenøren har vi difor droppa utvida stengetid, seier prosjektleiar Daniel Carløy Skjønsfjell i Statens vegvesen.

Kan forseinke framdrifta

Deler av oppgraderingsarbeidet i tunnelen kan berre utførast i plussgrader. Mellom anna gjeld det brannsikring av den vasstette duken i tak og vegger med sprøytebetong. Dette var bakgrunnen for at entreprenøren ønska utvida stengetid. No er det ikkje sikkert at entreprenøren får gjort heile jobben på denne sida av vinteren.

– Kjem kulda tidleg i år, må dei stoppe akkurat dette arbeidet. Får vi mildvær utan frost fram mot jul, kjem dei truleg i mål. Så no kryssar vi fingrane for ei mild førjulstid, seier Skjønsfjell.

Gjennomsleppet om natta blir flytta til kl. 00.30

Frå og med 16. november blir det nattlege gjennomsleppet av trafikk flytta frå kl. 02.00 fram til kl. 00.30 frå Flesa, og cirka kl. 00.40 frå Napp. Endringa er tilpassa vinterruta for ferjesambandet Bodø – Værøy – Røst – Moskenes  og gjeld gjennom vinteren. 

Stengetider gjennom vinteren

Frå 16. november:

• Tunnelen blir stengd som vanleg mellom kl. 23.00–06.00
• Nattleg gjennomslepp frå Flesa kl. 00.30
• Nattleg gjennomslepp frå Napp ca. kl. 00.40
• Gjennomslepp om morgonen som vanleg kl. 06.00