Filmatisk Cabaret: Sara Khorami debuterer som musikalskodespelar

CABARET
Manus av Joe Masteroff, musikk av John Kander og songtekstar av Fred Ebb
PREMIERE LURDAG 17. OKTOBER KL. 18.00
HOVUDSCENEN

I sentrum for det heile står Sara Khorami i rolla som Sally Bowles. Khorami har for lengst blitt eit kjent namn innan film, TV og teater. No er ho premiereaktuell både i Netflix-serien Legevakta  - og for første gong som musikalskodespelar i den legendariske musikalen Cabaret. Det har kosta utallige timar i dansestudio og hos røystepedagog, men no er Sara Khorami endeleg klar for å innta rolla som ein fullblods cabaretartist. 

Når ho dansar inn på scenen som Sally Bowles har ho eit orkester med trøkk, eit kobbel av elegante dansarar og eit knallsterkt skodespelarensemble i ryggen. Rolla som forfattaren Cliff Bradshaw blir spelt av Emil Johnsen. Preben Hodneland er den gåtefulle konferansieren Emcee, Frank Kjosås er smuglaren og nazisten Ernst Ludwig medan Gjertrud Jynge er den pragmastiske pensjonateigaren Fraulein Schneider. Saman skal dei formidle ei historie som dessverre framleis er aktuell.

Hedonisme og seksuell frigjering

På den dekadente Kit Kat Klub i 30-åras Berlin blir livet levd hardt og ingenting er tabu. Hit kjem Cliff Bradshaw, kastar seg inn i Berlins heftige natteliv og forelsker seg straks i den vakre nattklubbsongarinna Sally Bowles, men det blir ikkje ukomplisert. Medan festen blir stadig heftigare på Kit Kat Klub, strammar nazistane grepet rundt dei. 

Snevrare livsrammer

For Khorami er spenninga ikkje berre knytt til om dansetrinna og songane sit som dei skal. Ho tenkjer også på sine søstrer i moderlandet. Ho kjenner ein stad der Kit Kat Klub aldri kunne ha eksistert: 
- Ein stor del av meg tenker mykje på det med fridom og ufridom. I Iran er det ikkje lov for kvinner å synge solo.
LES MEIR

Men også i den vestlege verda er minoritetar under press, hatretorikken florerer og rammene for korleis folk kan leve liva sine har mange stader blitt skrenka inn dei seinare åra. Cabaret viser korleis det ekstreme gradvis blir normalisert og korleis folk flest, som Sally Bowles, lukkar auga for utviklinga i samfunnet til det er for seint å gjere motstand.

Store og små rom

Publikum skal bli tatt med til 30-åras hippaste hovudstad, Berlin. På dreiescenen møter salen dei nærast filmatisk detaljerte scenografiske romma til scenograf Sven Haraldsson; ein togkupè, ein butikk, ein sliten leilegheit og den røykfylde Kit Kat Klub, så klart. Her kan ein få med seg både det store bildet med eksplosive showopptrinn signert koreograf Silas Henriksen, og dei heilt nære bilda fanga på kamera av videregissør Mads Sjøgård Pettersen. Sjangerblandinga av film og teater har blitt eit varemerke for regissør og teatersjef Kjersti Horn, og det har ho for første gong med seg inn i musikalen.

Det vil bli lagt ut fleire foto i presserommet nærmare premieren.